DASAR, LAMPAH,GEGAYUHAN AGAMA BUDDHA

DASAR, LAMPAH,GEGAYUHAN AGAMA BUDDHA

1. DHASAR

Metha karuna:welas asih ingkang tanpa winates. Tegesipun gadhah raos tresna asih dhumateng sadaya titah ing madyapada.awit hyang maha suci anitahaken titah punika kawawas saking kasunyatan wonten 4(golongan):

1. Manungsa ingkang saged mobah, mosik serta ngucap.
2. Kewan,saged mobah tanpa mosik,ngucap naming sawarna
3. Thethukulan,boten mobah, boten mosik sarta boten ngucap.wontenipun namung ewah,minangka pratandha bilih gesang.
4. Titah alus,(lelembut), kangge ambuktekaken bab wontenipun lelembut inggih punika kanthi conto KEBLAK,umpaminipun, punika wonten swanten nanging boten wonten wujudipun. Jabang bayi ingkang dereng nandhang dosa, kalamangsa nggujeng piyambak tanpa tanpa liniling
1. LAMPAH

Madyama patipadha: lampah tengah-tengah

1.      Nedha.

Bilih nedha sampun ngantos keladuk utawi kekathahen,sebab dhateng badan padharan raosipun mboten sakec. Kosong wangsulipun bilih kirang nedha, datheng badan raosipun inggih lungkrah, badhe tumandang damel mboten kiyat.

2. Busana(nyandhang)

Busana ingkang langkung prayogi inggih ingkang samadya(salimrahipun) bilih tiyang ngagem busana boten limrah, ngantos rangkep langkung saking tiga, dipun tingali inggih kirang prayogi(patut)

Semanten ugi bilih babar pisan boten ngagem busana inggih boten prayogi. Kajawi gampil kataman sesakit(masuk angina) ugi dipun wastani kirang susila(sopan)

3. Filsafat(kapitadosan)

Adhedhasar kasunyatan lampahipun  Sang Buddha piyambak, tapa terus ngantos 6(nem) taun boten saged nggayuh katentreman. Nanging sareng dipun lampahi pitung dinten pitung dalu. Rambah kaping pitu, nembe saged nggayuh kasampurnanjati

Cethanipun: tiyang punika bilih tapa terus inggih namung ngrisakaken badan miwah bebrayan. Nanging bilih ngebo rawa (nedha terus), inggih nelas-nelasaken tedha sarta ngrisak-ngrisaaken prasasat kados gesangipun kewan

3. GEGAYUHAN

Katentreman lair batin.

1.Katentreman lair, srananipun:

a. Nyambut damel ingkang wekel(sregep)

b. Tresna asih dhumateng sama-samaning dumadi.

c.Setya-tuhu dhateng undhang-undhanging negaari

2.Katentreman batin, srananipun:

Anindakaken sejatining puja-puji miwah sejatining semedi

NGAYUH KATENTREMAN

Kangge nggayuh katentreman lair batin lan batin, kejawi ingkang sampun kasebat ing nginggil, para titah Buddha prayogi mangertosi wontenipun:

CATUR ARYA SETYANI

Catur= papat, Arya= sejati, setyani= kasunyatan. Dados ateges mangertosi dhumateng sejatining kasunyatan sekawan prakawis:

1.      Ananing panandhang:Lair, Dewasa, Sakit.

a.      Lair:

Tandhanipun nandhang: bayi ingkang nembe lair mesthi nangis kekejer/kekejeng

b.      Dewasa:

Tandhanipun  nandhang: mbetahaken nyandhang, nedha, sarta papan ingkang rowa utawi jemba.

c.       Sakit:

Menawi sakit punika sampun cetha bilih sakit punika nandhang.

2.      Sumbering panandhang:

Gebyaring raja-brana, lungguhing kawiryan, miwah mirasaning boga.

a.       Gebyare raja-brana:

Griya, tetumpakan sarta rerenggan

b.      Lungguhing kawiryan:

Drajat, pangkat lan semat.

c.       Mirasaning boga

Pait, getir sarta pedhes asining tetedhan.

3.      Icaling panandhang:

Sarana ngirangi ubaling hawa napsu. Inggih kenging remen nanging kedah samadya kemawon.

4.      Caranipun ngicali panandhang:

Sarana nindakaken HASTA ARYA MARGA

Hasta= wolu(8). Arya= Sejati. Marga= Dalan

Dados nindakaken sejatining dalan wolung prakawis.

a.       Sejatining kawruh:

Gesang ngaten wajib ngudi kawruh ingkang sejati, sampun ngantos kawruh ingkang leregipun dhateng kasangsaran.

b.      Sejatining mikir:

Menawi mikir sampun ngantos ngglambyar, ngalamun, mengeng, dados mikir ingkang sae.

c.       Sejatine ngucap:

Yen ngucap sampun ngantos natoni tiyang sanes. Langkung-lagkung ngantos nuwuhaken pasulayan

d.      Sejatine tumindak:

Sadaya tumindak kedah sarwa andhap asor tansah angajeni tiyang sanes/sesame-sami.

e.       Sejatine makarti:

Bilih nyambut damel sampun ngantos adamel kapitunaning tiyang sanes, sampun ngantos naming mikiraken dhateng betahipun piyamba.

f.        Sejatine pambudidaya:

Boten kenging ngakali tiyang sanes, utawi pados akal supados kasembadan gegayuhanipun, boten ngrugekaken asanes.

g.       Sejatine eling:

Kedah tansah eling bilih manungsa wonten ingkang anitahaken. Kedah tansah emut bilih begja sarta cilakaning titah among gumantung ingkang akarya jagad.

h.       Sejatine semedi:

Manungsan kedah tansah sumungkem dhateng Hyang Maha Suci(Sang Hyang Adi Budha)

Awit begja cilaka, bungah sarta susah.namung Hyang Maha Suci ingkang wenang murba lan mises. Nanging manungsa wenang ambudidaya. Wonten paribasan:GUSTI PARING REJEKI KUDU DIUDI. NUGRAHA SARANA TAPA. TUMEKANING JANGKA SARANA JINANGKAH

Patrap panembah: Awewaton pustaka suci Agami Budha, titah Budha manembah dhumateng Hyang Maha Suci (Sang Hyang Adi Budha)

Panuntun utawi nabinipun Sang Budha. Pustaka (kitab) sucinipun Tri Pitaka

Darmanipun Sang Budha Ingkang mekaten wau sayekti luhur miwah cocok kaliyan mobah mosiking jaman.

Kinarya panglipure panggalih, lan katur dhumateng Guru Agung kita, kula ngaturaken sekar kados ingkang kacetha ing ngandap punika:

DHANDHANGGULA

Lamun ora tidha-tidha malih,

Mpring piwulangnya Sang Budha Gotama

Sayekti gedhe gunane,

Agama Budha iku

Satuhune tansah nocogi

Mobah mosiking jaman

Tansah nora katun

Tumrap ing jaman merdika

Apadene ing ajuning jaman iki

Sayekti datan gothang

Kangge anambahi bukti ing nginggil bilih wilangan tiga/ gangsal wigatos ing nginggil upaminipun:

3(tiga)Kapisan:

Manunggaling kawula gusti(pamor), wilangan wanci: enjang,siyang, sonten

3(tiga) kaping kalih:

Tumraping negari (Kamardikan): trias politika:

a.       Exekutif: Bidang pelaksana (Presiden, para Mentri).

b.      Legeslatif: Bidang social, control social sport, sosiol parcifisien, sosiol sponsibilite(DPR)

c.       Yudikatif: Mahkamah Agung(Jaksa Agung)

3(tiga)ingkang katiga:

Angkatan perang: darat,gegana,lan samodra.

Sumpahing prajurit: Triubaya sakti.

Sumpahing Akri: Tribrata

Wilangan 5(gangsal):

Dhasaring negari gangsal inggih punika pancasila

Arah keblat: 5

                        Reca candhi Borobudhur: 505

SEJARAH LAIRIPUN SANG BUDHA NAMPI WAHYU,NIBANA (muksa)

SEJARAH LAIRIPUN SANG BUDHA

NAMPI WAHYU,NIBANA (muksa)

Kinarya mbawani Tri Nugraha ing nginggil kanthi rinipta ing sekar srinata(Sinom)

Nuju ratrining purnama

Sajroning taman lumbini

Tentrem tan nana nyabawa

Nadyan kewan saba bengi

Warga sang narapati

Lagya nedheng ngayun-ayun

Laire sang jabang putra

Brol lair ing madya ratri

Suka marwata sang prabu sudadana

Ing negari kosala tlatah hindia sisih le ring ereng-erenging gunung mahameru ing kitha kapilawastu, sidhem premanemdatan wonten sabawaning walang alisik, nadyan sunaring sang retuning nuju purnama sidhi, kewan-kewan saba bengi ugi tan nyabawa kaya-kaya kandheg melu asung pambagya ingkang badhe rawuh

Para narapraja miwah kulawangsanipun sang prabu sudadana sadaya samya ngempal wonten ing madyaning taman lumbini, ugi tan nyabawa awit kaprabawan sang prameswari Dewi Maya ingkang nanggulangi kridhaning sang jabang bayi ingkang wonten salebeting Guwa Garba, awit sang jabang sampun titi wanci tumedhak ing madyapada

Nuju madya tengah ratri Dewi Maya nyuwun miyos dhateng sang prabu sudadana lajeng ginandheng asta nira miyos sajawaning wangon ampriksani endahing sunaring sang Dewi ratri kang nuju purnama sidh. Sang prabu kekalih ngungak ing akasa ing ciptarasa karsa   pineleng dadya sajuga among minta pangayomaning Hyang Maha suci mprih kalising sambekalalaire sang jabang bayi

Nyata katarima panyiptanira katandha ana cahya gumebyar, ilange cahya katon ana gajah putih ing ngarsane sang prameswari ingkang sareng kakedhepaken ical saking panduluning netra sasirnane gajah putih wau sigra sang putri nyuwun manjing jroning pasanggrahan taman lumbini.prapta jlog jroning pasanggrahan adreng kridhaning sang jabang sigra brol lair miyos kakung ing taun 623 S M (Candra sengkalanipun TRI RATNA KEKANTHEN ASTA)

Pepak sagunging para narapraja miwah para Brahmana inggahing para jawata ingkang samnya mangajab mangayubagya lairing sang jabang bayi

Salah satunggaling pujangga ingkang sampun sepuh sasampunipun naliti tandha- tandhaning keagunganing sang jabang bayi sigra sarikutan angusapi waspa, nangis sesengkruan; dinangu sang prabu matur walaka bilih ingkang putra sayekti titah ingkang agung ing benjang dados pangayomaning jagad lair lan batin lamun boten dados nalendra

Amung kuciwaning sang pujangga  dene mboten saged amenangi keagunganipun sang jabang wau

Sareng midanget aturipun sang pujangga wau suka marwata penggalihipun Sang Prabu Sudadana

Putra sinung asma pangeran Sidarta.Amung gawoking lelampahan dene sang prameswari Dewi Maya boten kapareng momong putra ngantos katinggal kaagunganipun namung wenang pitung dinten amomong putra sampun tinimbalan ing ngayunaning Hyang Maha Suci

Sang sidarta sayekti titah kang pinunjul cocog kaliyan wecanipun para Brahmana ingkang samya meca du king lairipun sang sidarta. Kacetha wonten ing salebeting pawiyatan-pawiyatan kasusastaran kaprajan kanugrahan para dwijanipun tansah kalanggar ing kawicaksanan. Saya agung panggalihipun sang prabu sudadana anguningani kawicaksananipun ingkang putra mila tansah ginadhang-gadhang sageda gumantya narendra ing praja kapilawastu sampun ngantos dados Brahmana kados wecanipun para Brahmana du king nguni. Mila ingangkah  sang sidharta supados boten anguningani dhateng kasangsayanging para titah ing madya pada ingkang nandhang papa cintraka ngantos dipun yasakaken pasanggrahan tri mangsa (telung mangsa), inggih punika a. mangsa asrep b. mngsa madya. C. mangsa panas

Sareng yuswa 23 taun sang sidharta kapalikramakaken kaliyan putranipun sang prabu supra budha ing negari ayodya inggih sang putri yasodara sarana sayembara: kanuragan kadosta menthang langkap miwag titising pamanah, kalaksanan sang sidharta saged mboyong putri ingkang sulistya ing warna miwah sejatining wanita. Mila boten aneh tansah renteng-runtung  kadya mimi lan mintuna anggennya akekaronsih anindakaken darmaning satriya mudha

Ndungkap 4 taun sampun sinung putra miyos kakung pinaringan wasiyat pangeran rahula

Titi wanci sang sidharta arsa sinengkakaken ing ngaluhur ngasta pusaraning praja ngrigenaken ubeng ingering negari sang sidharta nedya cangkram ingkang ingajap para nara praja wanita lan pria

Enjang budhal gumuruh saking negari kapilawastu, katinggal upacaraning bebarisan, klebeting gendera rontek miwah tengara matalu-talu yen cinanra panganten binayang baying. Umyek para kawula ing negari kapilawastu sareng miring calon ratunipun badhe cangkraman miwah tengara ambal-ambalan, priya wanita kutha desa rebut dhucung silih ungkih nggennya samya angadhang satepining marga ingkang badhe dipun langkungi lumaksananipun  pangeran sidharta saderengipun linangkungan sang prabu sudadana sampun wara-wara sampun ngantos wonten tiyang cacat, cala ina, sudra papa, papariman, Brahmana miwah boten kenging mancaka layon. Lamun nerak paliwaraning nalendra gedhe pradataning nalendra

Nanging ubeng ingering jagad hamung ingkang Maha Suci ingkang murba-wasesa, mila sanadyan sampun wonten paliwara ingkang mekaten, kapeksa lampahing barisan upacara mprangguli ingkang dados wewalering narendra ingkang sampun kawibarakaken

Sang sidharta saben-saben mrangguli tiyang ingkang cacat,cala ina,sudra ,papa ina papariman tansah ndangu punapa pribadinipun ugi saged kataman panandhang ingkang makaten wau.

Dening pandherek dipun wangsuli,saged,

Angglong tyasira sang pangeran sidharta sareng kamukten punika mboten saged langgeng sarta gesang punika dados jagading kasangsaran ingkang kantun piyambak sang sidharta mprangguli Brahmana ingkang wicaksanaingkang pasuryanipun kadosdene medal sorotipun.sang sidharta ugi ndangu,kawangsulan inggih punika naminipun Brahmana ingkang sampun nggayuh kasampurnaan gesang lair batin.sigra sang sidharta ndhawuhaken dhateng manggalaning bebarisan kondur angedhaton.

Dumugining prajamatur ingkang rama nedya tapa brata ngupadi kasampurnan kinarya ngentasaken para titah ingkang tansah nawung kridhaning kasangsaran.mesthi kemawon Sang Prabu mboten marengaken. Nedya garwa ugi anggendholi, awit ing reh sesarengan anggulawenthah ingkang putra pangeran.Rahula mbentoyong penggalihipun sang sidharta sareng midhanget dhawuhipuningkang rama miwah aturipun ingkang garwa, legeg penggalihipun kadya dhinodhog jajanipun njenger tan saged ngucap mbegegeg kadya tugu sinukarta. Nanging bawaning satriya tama penggalih ingkang mekaten wau saged sinamudana, nanging ing cipta sedyanira tan gumingsir sarabut pinara sasr. Mila sareng madyaning ratri kepara garwa miwah putra sampun sare, sang sidharta ampreksani ngleketeripun sang putra ing kekepane sang ibu ing cipta cat tega,cad boten nanging titi pamawasing netra lamun sang putra sampun kuwawa pangkruketing ibu miwah panggulawanthahing wibi,sigra los saking sananendra kadhereaken abdi tetiga sampun kasamekteaken turangga ingkang sampun rinakit. Turangga kagebrag mbetah kadya kilat kesit kadya thathit sirna saking panduluning ratrining kitha lumebet ing desa-ngadesa prapteng tepine wana uruwela ing ereng-erenging gunung himalaya. sigra tedhak saking turangga.busana kasatriyan karucat,santun ngagem busananing ngatapa miwah rikma kaparas kakintunaken abdi pandherek katur ingkang garwa kinarya pratandha bilih sang sidharta mangun tapa.

Sang sidharta noraga njalajah wana wasa tumuruning jurang trebis, kala mangsa mrangguli para Brahmana ingkang sami mbangun teki sang sidharta wawansabda luhuring kasampurnan ngantos rambah kaping gangsang. Nanging sadaya wau dereng saged minangkani pamundhutipun sang andon lelena brata mila ing cipta nedya teteki pribadi ngantos saged ngayuh arya marganing katentreman(arya= sejati)

Lampah meketen wau tri warsa salebeting guwa, tri warsa sangandhaping mandera ngantos sarira kuru aking lamun cinandra lir raga koncatansukma madyaning ratri wonten sasmita wewentehan lampah makaten wau kirang leres awit damel sangsaraning raga pribadi kang tanpa wates miwah garwa putra ingkang taksih dados wewenangipun.mila lajeng kondur manggihi garwa lan putra nanging ing cipta tetep badhe ngudi kasampurnan jati namung lampahipun saben pitung dinten pitung ndalu tuwi garwa putra. Lampah makaten wau ngantos rambah kaping pitu sampun ndungkap kasampurnan jati kados rinipta ing sekar: SRINATA ing ngandap punika:

                                   

                                    SINOM

Mancorong sunaring candra

Sumunar tan pilih kasih

Yata pangeran sidharta

Mempeng denira semedi

Sangandhaping wit budi

Tumuruning wahyu agung

Ya madyama patipada

Twin catur arya satyani

            lampah hasta arya marga kang utama





NB: Nyuwun sewu dumatheng sagunging pamiarsa Tulisan punika dereng rampung, mangkih kasambung maling menawi kulo sampun gadah wekdal damel lajengangen tulisan punika. nuwun nuwun lan matur nuwun

WANGSULIPUN AGAMI BUDDHA

WANGSULIPUN AGAMI BUDDHA

Wangsulipun Agami Buddha kawawas sarana sejarah.

Bebukaaning sejarah wangsulipun agami Buddha, amprihamprih resep ing pamireng rinengga ing sekar Dhandhanggula

                       

                                    DHANDHANGGULA  

                       

                        Candranira kinarya ngluri,

                        Piwulangnya sang Buddha Gotama

                        Lir kebo mulih kandhange,

                        Khaceta ing Borobudhur

                        Ingkang dadya minangka seksi

                        Yekti piwulang Buddha

                        Kang ingagung-agung

                        Mula nira para kanca

                        Ayo podha bebarengan ngurip-urip

                        Nuhoni marang Dharma

Dados menawi dipun wawas sapunika para siswaning Sang Buddha katinggal ngrembaka, saben dinten tansah mindhak,awit saking dipun sebat ing saloka , KEBO MULIH ING KHANDANG.

Katitik muni-muni. Solah-tingkah , tandang-tanduk, tandang-grayang, lair batin ing madyaning bebrayan punika, cetha sanget bilih jiwanipun taksih ngrembaka dhateng piwulang kabudhan, kajosta: pakecapaning basa, bebasan, trap silaning pasrawungan, tatacara, tandang graying bebrayan lair batin. Umpaminipun: nalurining sesaji, babagan balai wisma/griya, ingkang sarwa tiga kadosta: badhe nabuh gamelan mawi sesaji,beksa mawi dipun tabuhi, wilanganing beksa mawi tiga lan gangsal. Lelagon jawi mawi paugeran pathet inggih tiga. Slendra: nem, sanga lan manyura. Pelog: lima lan barang.

Seksi ingkang sanyata: candhi Borobudhur boten saged kebantah malih, awi punika cetha wewangunan Buddha. Mangka punika tilaranipun kaki-nini duk ing nguni ingkang tansah ingagung-agung, serta sayekti dados pratandha kaegunganing kaki nini kita. Kangge ngluhuraken panutan Agama Buddha. Tumpraping,negari sarta bebrayan umum,saben wonten tamu saking manca negari ing saindhenging bawana, mesthi merloaken dhateng Borobudhur. Dados cetha sanget bilih kaki nini kita wiwit kina makina sampun ngrasuk agami Buddha sarta sampun mbalung sumsum tuwin thandes ing sanubari. Dados agami Buddha (Dharmanipun Sang Buddha) sampun kuwawi ngluhuraken kuncaraning bangsa miwah negari warata ing saindheinging bawana.

Tuwin malih bilih katiti saking sejarah, Adhedhasarlaladaning negari duk kuncaranipun prabu smaratungga ingkang yasa Candhi Borobudhur, Mendut, pawon, plaosan, kalasan, candhisar, miwah candhi sewu. Laladaning negari sisih kilen:dumugi Madagaskar, ler: dumugi pulo formusa, malah indocina ugi kalebet laladan negaripun prabu smaratungga, wetan dumugi Irian.

Para raja reh-rehan kala wau sami manungkul tanpa karana ginebag ing bandawala pati (perang) namung saking kayungyun payoning kautaman .

Bab agama Buddha, boten namung ubeg ing jawi Tengah kemawon nanging sumebar waradin ing saindhenging Nuswantara (Indonesia). Buktinipun ing Sumatra(Lampung ler) wonten kraton tulang bawang ingkang run temurun, kadhatuwan sriwijaya ing Palembang.Ing Kalimantan ugi wonten kraton kutai, inggih sang Mulawarmann ingkang minangka rajanipun. ing jawi kilen krajan Tarumanegara,ingkang dipun asta dening sang purnawarman, jawi wetan kaprabuan majapait kasta prabu Brawijaya,sang udayana ing bali sarta sang candradewa ing Irian

Pramila boten nama aneh sareng wonten piwulang Buddha thukul malih,para sanak kadang, mitra karuh sami andalidir sami tumut alelumban ing madyaning pawiyatan Agama Buddha,ingkang dipun beberaken dening ingkang kawogan ambabaraken Dharmaning Sang Buddha

Pramila sumangga sami dipun leluri. Nanging punika boten kanthi raos peksan, awit bilih sarana peksan punika cengah kaliyan Dharmaning Sang Buddha ingkang adhedhasar METHA KARUNA (welas asih)

Para siswanipun Sang Buddha, minangka selingan mrih regenging sarta reseping swasana kula ngaturaken sekar Dhandhanggula candhakipun sekar ing ngajeng

                                   

                                    DHANDHANGGULA

             Pancen nyata jaman Majapahit,

            Jaman nira prabu Brawijaya

            Ingkang dadya panutane

            Agama Buddha iku

            Ingkang samya pinundhi-pundhi

            Sagung pra nara praja

            Myang kawulanipun

            Kacheta jroning bebrayan

            Patrapira sesaji miwah semedi

            Yekti piwulang Buddha

Pancen nyata jaman Majapahit jamanipun prabu Brawijaya Agama Buddha lan Hindu dados agamaning negari. Pujangganing Agama Buddha: Mpu Prapanca, tetilaranipun awewaton sejarh: Candhi kidal, panataran, jago, candhi sukuh

Nitik anggenipun boten ambedak-mbedakaken kasta miwah jinising manungsa (jaler-estri), miwah jejeging adil, kaprabuan Majapahit wonten raja 6 (nem) ingksng kalebet agung: Tribuwana,Tunggadewi, Wisnuwardani sarta suhitarini (Kencanawungu, ing langendiyan)

Mila para wanita ingkang boten tidha-tidha malih, sami nyinau Dharmaning agama Buddha salebet-lebetipun, kinarya mangsulaken kawibawaning para wanita dados duking nguni miwah purwanipun

Wiwit nara praja miwah kawulanipun kakung-putri, sugih utawi mplarat, sami ngaken Agama Buddha, tur sami nindakaken kanthi mulunging panggalih

Mila mboten aneh bilih ing buku sejarah sinebat Negara kerta gama. Kerta tegesipun boten gadhah mengsah (cecengilan). Gama: para kawulanipun sami nindakaken agami kanthi tulusing manah

Mekaten ingkang jalari bebrayan punika ngantos sapriki angel sanget kapurih nilaraken sesaji

Mila menawi nitik rumpakan sekar Dhandhanggula cetha sanget Dharmaning Sang Buddha ngrembaka ing jiwangga/sanubarining bebrayan

Semanten rumpakan sejarah kabudan ingkang saged kula aturaken sarta sakedhik kabumbonan buku-buku babad tanah jawi,mugi kenginga kangge garan para siswanipun sang Buddha ingkang sami anresnani sarta angeluri Piwulang agami Buddha tuwis kaki-nini ing nguni

PRAWACANA

PRAWACANA

Pustaka Tri Darma Kawedhar kaping IV.

Nuwun para Bapak/Ibu, kadang Upasaka/Upasika sarta para maos ingkang kula mulyaaken.

Namo sang Hyang adi Buddhaya. Namo Buddhay.

Nuwun kula minangka Pembimbing Masyarakat Buddha Kantor wilayah Departemen Agama Jawi Tengah, kanthi sineratipun pustaka Tri Darma Kawedhar ingkang kaping sekawan, kula ngaturaken gunging panuwun ingkag tanpa upami dhumateng Sang Hyang Adi Buddha, ingkang sampun anurunaken kawicaksanan dhumateng pangebating Agama Buddha Mahayana inggih panjenenganipun Bapa Maha Nayaka Pramonowirono.Ingkang kanthi pustaka punika

1.       Para titah Buddha badhe saged mangertos sapinten lebetipun ajaran-ajaran agami Buddha.lan badhe saged nindakaken tata cara,upacara agami Buddha kanthi leres.

2.      Badhe saged dipun mangertosi dening sinten kemawon lan ugi saged dipun mangertosi dening para nara praja, bilih ajaran agama Buddha cocog sanget kaliyan Undang-undang 1945 Negari Repoplik Indonesia ingkang ajawi Pancasila.

3.      Inggih pustaka Tri Darma Kawedhar punika Agama Buddha kuncara malih ing nuswantara,awit:

a.       Bangsa kita kanthi maos pustaka Tri Darma Kawedha, pirsa sejarahipun kaki nini ingkang sampun kuncara ing jagad raya kanthi nilaraken patilasan-patilasan Agung

b.      Inggih khanti pustaka punika titah Buddha saged mangertosi, dhasar, lampah sarta gegayuhan Agami Buddha, ingkang ngewrat ajaran catur Hariya setiyani. Hasta Hariya Marga.

c.       Inggih pustaka punika ingkang ngewart ajaran tata cara lan ajaran Agama Buddha ingkang adhedhasar saking pustaka suci Tri Pitaka saha kalarasakenkaliyan kapribadening Bangsa Indonesia

            Para paos ingkang minulya, sanadyan kathah pustaka tuntunan agami Buddha ingkang kula waos nang dereng nate wonten pustaka ingkang ngewart upacara Agami.

            Kadosta tatanan caraning manembah patrap saha solah tingkahipun,tatanan tanggap jabang bayi,temantenan pangkrimating layon lan sanes-sanesipun.

            Mangka sareng kula maos pustaka punika saha kula mangertosi, katingal sampurna, runtut lan wijang tatanan satunggal lan satunggalipun.

            Pramila ing agesangkedah mangertos panjing surup la nasal-usulipun:

           

1.      Ngaturaken sembah pangabekti dhumateng tiyang sesepuhipun.

2.      Setya lan mituhu dhumateng Guru jati.

3.      Sembah sumungkem dhumateng Hyang Maha Suci

            Wasana minangka panutup, bilih wonten kaladuking atur mawantu-wantu nyuwun aksami. Yogya ,yogya ,yogya  

                                   

                        Namo Buddhaya

Semarang,tgl 30 juli 1988

Pembimbing Masyarakat Buddha jateng

SOETOMO, BA.

NIP :130080611.

MANTRA SAKTI

MANTRA SAKTI

DUDUK WULUH

1. Sembah ulun, sungkem Hyang Maha Agung,

Sun susuwun mugi-mugi, sedya ulun den kinabul

Sirna memalaning urip

Sang Budha paring pangayom

2. Rasa muhung, rumeseping balung sungsum

Rasa rumangsa ngrungkebi, rah tumrah pra leluhur

Rasa sumanggeming budi

Rumajang miwah reroyong

3. Nandhang wuyung, nuruti sasmita luhung

Narbukaning manah suci, nindakken dhawuh Hyang Agung

Nulya bangkit ing panganggit

Nenangi raosing batos

4. Panembahku, punjering panembah ulun

Paringa nugraha jati, pindha kartikaning esuk

Panjrah puspita sinuji

Prabancana kang sumorot

5. Darmaipun, dumugi ing janjinipun

Dadi pepeling kang edi, ndungkap gangsal atus taun

Dredah krajan Majapahit

Dahat Sabda Smara katon

ASMARADANA

6. Manembah Hyang Maha Suci,

Mugi peparinga welas

Mring kawula ingkang lamong

Momong sagung titah Budha

Madya wusananing darma

Mring pepalang malang megung

Musna datan karana

7. Cloroting wahyu sejati

Candra surya lan kartika

Cipta rasa mring Hyang Manon

Cahya sumunar trawaca

Cihna lamun katarima

Clorot wahyu kadya ndaru

Cumunduka titah Budha

8. Jana mudra jroning smedi

Jumangkah raos manembah

Jroning cipta mring Hyang Manon

Jaya-wijaya paringna

Jabang bayine kang muja

Jiwa muhung mring Hyang Agung

Jinurungna kang sinedya

9. Wus lami nggen kulo nganti

Wangsul Budha Mahayana

Winongwonga wahyu Prabon

Wus nate ing Nuswantara

Wibawa Dwija Wiyata

Watara dwi dasa taun

Wayah wareng siwur nyadang.

SURA DIRA JAYANINGRAT LEBUR DENING PANGASTUTI

SURA DIRA JAYANINGRAT LEBUR DENING PANGASTUTI

Kawedhar ing sekar SINOM

1. Sura dira jayaningrat,

Ra sura tegese wani

Dira teges kaprawiran

Rasa prawira lan wani

Jaya tan na wani tandhing

Ya rasa digang adigung

Ning rat tan ana kang padha

Rat jagad dianggep sepi

Datan eling wasesa Hwang Murbeng Jagad

2. Lebur dening pangastutinya

Bur lebur tatas lan tapis

Dening pakarti utama

Ninging cipta den kaesthi

Pambudidaya basuki

Ngastama mring Hyang Agung

Tumindak titi tumata

Tinaliti kang pratitis

Nyata lebur saka pakarti utama

KIDUNG WUNGON WIDADAREN

KIDUNG WUNGON WIDADAREN

(menawi putra aras Slendro, manawi putri larasipun Pelog)

Dhandanggula

1. Anyar kara kinarya murwani

Ing bubuka tata upacara

Angluhuri nalurine

Ing wanci dalunipun

Amiwaha midadareni

Ingkang adarbe karya

Aglar guyub rukun

Ameminta rahayua

Ing purwa madya wasana mangun kardi

Ayu ayem raharja

2. Jana mudra ya angesti puji

Jinurunga ing sasedyanira

Jumbuh ing katresnane

Jatukrama jinurung

Ji pinuji amidadareni

Jumedhul Sang Hyang Kama

Jaya Ratihipun

Jawata ing Cakra kembang

Jangkep angampil kembar mayang kekalih

Jinodo sinisihan

3. Dumadining titah akaronsih

Dasihira dinarma ing wedha

Darma laksita jatine

Dinamu dadya sadu

Dumadi lumahing pratiwi

Dirgantara nyabawa

Dara dasih madu

Dur angkara samya sirna

Dwi purna darma Sang Kamajaya Ratih

Ndirgantara mekayang

4. Meh madyaning ratri kang pinuji

Memuji Sang Ratih Kamajaya

Marma kalis rubedane

Manembah Hyang Maha Agung

Matur gunging panuwun sami

Madya purwa wasana marmanta winahyu

Mawantu atur kawula

Molak malik sastra lukita kang runcit

           Minta kasamanira

NAMA TAUN MIWAH WINDU, KANG CINITRA ING SEKAR

NAMA TAUN MIWAH WINDU, KANG CINITRA ING SEKAR

POCUNG

1. Namanipun Tahun jawi jatinipun

Aji kang kawitan

Mawa surasa kang wingit

Cucuk gathuk tata laksana budaya

2. Manut petung, pinetung ing para wiku

Dwija kekalihnya

Dwi teges wilangan kalih

Loro jodho guru laku palakrama

3. Tata taun, tumata tansah lumaku

Puji katrinira

Basa pangucap mring widhi

Tri Murti teges sing sastra wicaksana

4. ugeripun wilangan kang genep iku

Muja kapatira

Muja tegese semedi

Sengsem marang budaya ingkang susila

5. Njanur gunung, kadingaren metang petung

Nuswa kang kalmia

Manca pat manca nagari

Tasik angka nama taun kenrima

6. Wasana mung, mungkasi wilangan tahun

Dhusun kaping sapta

Prasetya pra wiku yekti

Gesang namanira taun kaping hasta

7. Windu iku wilanganing taun wolu

Papat cachira

Kawiwitan windu Adi

Kalihira anama windu kuntara

8. Ndungkap telu, wilanganing tahun wolu

Jangkep kaping papat

Sancaya windu kawuri

Jangkep papat winahyu Hyang Amurbeng jagad

MIJIL

MIJIL

PL/6

1. Amiwiti caraka tinulis

Nuladha carios

Cinarita sagung leluhure

Rasa rumangsa ngrungkepi

Kwajiban dumadi

Dumadining taun

2. Taun Jawi sayekti wigati

Sakeh sagunging wong

Wongsa Jawa tanggap tan nglirwakke

Lirwa marang pipelining kaki

Pepali mring Widhi

Dhinadha satuhu

3. Jana mudra ya angesti Budhi

Ya estining batos

Nyuwun mugi kalis rubedane

Madya purwa amungkasi ugi

Ginulanging Budhi

Budhi thuking taun

4. Thukul taun jawi kang tinangi

Ngesti Budhi katon

Eka purna jawata nunggale

Nunggal cipta cinipta ing Budhi

Cinandhi syang ratri

Rereh raras rampung.

ASMARADANA

ASMARADANA

PL/5

1. Hanacaraka tinulis

Nama Denta Wiyanjana

Cekap dwi dasa wus momot

Rumpakan maneka warna

Karuh lair batin uga

Dadya wewatoning petung

Tumprap arsa paring nama

2. Satuhune warsa Jawi

Wiwit kuna-kuna mula

Lamabang lampahing lakon

Pindha surya candrantika

Dhateng manungsa supana

Jiwa agal alusipun

Yekti datan kasamaran

3. Nyamut-nyamut kang tan uning

Mring wijaning santra jawa

Guna pigunanging batos

Batos winong wong Bathara

Thuk ing sastra kalih dasa

Ngujwala ing jiwanipun

Hanacaraka manuksma